塗炭屎若無經過專業處理、凊彩埋，就會汙染塗肉。民間團體今日開記者會，要求政府莫閣撥預算買塗炭，嘛愛隨停止興達電廠燒塗炭。

台灣健康空氣行動聯盟喝口號，要求政府請興達電廠停止燒塗炭、減少台中火力發電廠買塗炭的預算，嘛愛落實大型企業百分百使用綠色能源發電。

葉光芃醫生強調燒塗炭的汙染物毋但損害空氣，對人體嘛有輻射危（guî）害，彰化環保聯盟嘛舉芳苑養殖區魚塭仔，自2013年埋塗炭屎佮有害廢棄物到今，塗肉的重金屬猶超標，望政府降低買塗炭的預算。

莊秉潔表示，彰化有袂少離岸風電站，未來若會使佇離岸風電廠邊仔，起專門分解有毒塗炭屎的處理廠，用離岸電廠無滿載的電，來共塗炭屎玻璃化，就會使有效運用電力，嘛解決塗炭屎污染的問題