生態豐富的湳仔地，毋但是渡鳥重要的生湠地，也有吸收二氧化碳、保護海岸的功能，但是根據農業部生物多樣性研究所的調查，臺灣西海岸的湳仔地這百外年來，因為人為開發，消失將近58%的面積

農業部生物多樣性研究所副研究員 陳宛均：「沿海的坉海造陸，有養殖漁業區抑是作田區，所以開始湳仔地予人坉起來變田抑是魚塭，所以（湳仔地）面積開始減少。1980─90年代這段時間，因為開始有離島工業區，抑是沿海工業區、商業港口佮漁港，所以面積閣繼續減少。」


臺灣西海岸的湳仔地面積對1950年代的四百外平方公里，到今只賰兩百外平方公里。目前全台灣湳仔地面積保留上完整的所在，就佇咧彰化的漢寶、芳苑佮濁水溪出海口的大城湳仔地，遮毋但是東亞渡鳥誠重要的歇睏站，嘛是沿海養殖業飼魚、飼蚵仔重要的營養份來源。

彰化野鳥學會總幹事 李益鑫：「水鳥仔啦，就是講，佇咧海坪咧活動遮的鳥仔，其實伊是代表咱人。咱人無可能24點鐘去觀察遮有啥物生物嘛，但是伊佇咧遮活動，就是咧共咱講，有足濟物件予怹通好食；就是因為有通好食，所以遮的（湳仔地）生物，會使轉做咱生產的一个產品，就是我一直咧講，彰化的蚶仔、蚵仔。」

聲音來源 彰化縣環境保護聯盟總幹事 施月英：「阮嘛希望彰化海岸緊畫入去國家溼地，阮欲來寫這个提案，緊來處理，今年應該就會當送出去。莫閣共破壞，緊保護起來，予逐家人來使用，因為就變成公共財，逐家攏會當使用。」


環保團體表示，湳仔地是地球的生態系統之一，充滿生產力、生態豐富，閣有調節水量、淨化水質濟濟功能，這陣也當咧申請國家重要湳仔地，希望會當透過濕地保育法，保護這片台灣上大的湳仔地生態。

記者 楊舒晴 彰化報導